فلان (#1) طالب

مافي على لسانو إلا جملة بدي اطلع من هالبلد

بس لأتخرج بدي سافر بدي أمن مستقبلي
الحياة هون ما بتنطاق , ظروفي , أهلي , شغل ما في ..
لك نحنا كيف عايشين والعالم كيف عايشة
..
لأ وبيحب شي بنت وبيأسها و بيأسك من الدنية

وبيقضيها نئ نئ نئ

….

فلان (#2 ) من شي سنة بس سافر ع بلاد برا

ولما بيرجع بتحس كأنو عاملينلو غسيل مخ بهالسنة

بياكل ملوخية …لك فاصولية
و بيقلك كيف بتساووها ؟
شو ما شاف بيقلك … لك شو كان اسمها هي ؟
عراس لساني… بيقلك اسمها بكل اللغات الا العربي بتعصلج معو ترجمتا
وعلى شلون كانت هي , ووين هي , ومين هي ..
ومالو حل إلا تعينلو مرشد سياحي يأنقذوا بالشوارع يلي ما عاد بيعرفا بنوب

انو يا رجل حلك تنسى بهالسنة برا الأربعين سنة يلي عشتن هون ؟

……
فلان (# 3) متغرب برا البلد من عشرين ستة

الكل ناطروا بلهفة ليشوفوا
لما بيوصل بيسلم عليك كأنو مبارح شايفك
بتلمسوا بتحسوا بلاستيكي ,
يحكي بالانكليزي بعدين بيترجم للعربي
لما بيحكي بالعربي بيكون مكسر ,
واللهجة تلقائيا سطحية كأنو طالع عم يحكي عالتلفزيون بشي مقابلة من برامج ” التلفزيون والناس ”

بيقلك بفخر ولادي ما بيحكوا عربي .. نحنا ما بنحكي عربي
يييي ما باكل غير أكل عضوي
سوري ما بقدر زوركن مابمشي بالغبرة
لك ليش هيك عندكن غبرة ؟
لك ليش عندكن كتير زبالة . ؟
ييي لساتكن هيك بتعملو ؟
بيحاكيلك ست عمرا شي 80 سنة بيقلها : بس روح خلينا نتواصل عالايميل
وطول الوقت بيقلك
لك ليش هيك سرافيسكن , ليش هيك تكاسيكن ..
لك ييي ييي

……

فلان(#4 ) عايش داخل القطر

حكى عن فلان (#1) وفلان (#2) وفلان (#3)
شو مأنزعين , شو متغيرين
وبلش يضربها وطنيات
لك كيف نسيو البلد !
وهو من عشرين سنة عم يلاطش بالسفارات لك بس بدو يطلع برا البلد
كرمال الله فيزا .. كرمال اليتامى كرمال الحبايب
لك مشان الله , أمنولي ساعدوني , دينوني
فيزا صغيرة بتدفع بلاوي كتيرة

…….

فلان (#5) مواطن مقهور

عم يسأل حالو سؤال
ياترى بشي بلد من العالم بيتقاتلو ليجيبوا فيزا ع سوريا ؟
بيرجعوا ع بلدهم وبيمدحوا بسوريا ؟
وبيتأمل يكون الجواب أي
ويكون في حدا عم يحكي بالمنيح علينا
لك مو مشان شي
مشان اذا ماطلعلنا خير باللي جوا , بلكي بيطلعلنا خير بيلي برا !!!!

……

Advertisements