-1-

 

–          شو آخر أخباركم ؟

–          والله هلأ ودعنا ” فلان  ” طال عمرو

–          ليش كان عنا ! ” مع كتير من الاستغراب “

–          أي ليش ما لك دريان  ؟ وعملنالوا استقبال طويل عريض لك وجبنا كاميرا حقا هديك الحسبة وطقيناه كم صورة للذكرى و علقناهم عالحيط ليشوفوهم الجيران

–          لك كل علمي مختلفين معو ومو مخلين عليه ستر مغطى بكل الـ ” دنيا ” كيف هيك ؟

–          أي والله هيك صار طب غم  .. بتعرف الشوق شو بيساوي بالواحد

–          يا أخي القصة قصة مبدأ ومشان جارنا ” ثابت ” كمان  بلكي ” انهز ” بدنو ؟ , بتعرف كتير كان متدايق منو ..

–          لك ياعمي  لا تدقق  أمورهم كلها انحلت ..

–          والله مزبوط متل ما بيقولوا .. بين  ” الأكابر  ” ما في تكليف !

-2-

_ كيفو رفيقك ” نضال ” ؟

_ والله متدايق كتير

_ خير خير انشالله ؟

_ ياعمي معلمو دائما بيطعميه ” سَـــلَـــطة ” بالزور

_ أي والله الله يعينو ما حدا بيحب السلطة  تقيلة عالنفس  بتجي

_ لأ والعلة  انو ما بيسترجي يزعلو يعني شفت هديك المرة لما زعلو شلون فصلوه من الشركة وطلع لبرا البلد لأمن حالو كم سنة  ورجعو رضيو عليه شوي

–           اي مزبوط بس سمعتلك سمعة عن هاد رفيقك نضال   قال هو بيطعمي ولادو ومرتو سلطة بالزور كمان

_ شو هالحكي ؟

_ الله وكيلك , ومو بس هيك ولادو بييطعمو رفقاتهم سلطة بالزور كمان

وجيرانهم الواصلين بيطعمر جيرانهم الفاصلين بالزور كمان

_ له له له

_ قلك شغلة بس بتضل سر بيناتنا , وما بتغير وجهة نظرك فيني

_ خير  وغوشتني شو في ؟

_ هادا يا سيدي .. انا ما بحب السلطة كمان بس بيطعموني ياها بالزور وأنا بطعميها للناس بالزور ..

_ والله يا أخي سرك ببير … خوش الحال من بعضو ..

_ بتعرف شكلنا على هالحالة طول عمرنا رح نضل عم ناكل سلطة

_ بتعرف  قوم قوم على هالسيرة بدي طعميك  زبدية على حسابي !

 

_3_

 

_ شو جابك لعند ” بيت خالتنا ؟ “

_ دخيلك وبدك تحاسبني كمان ؟ على أساس كتير مشوار حلو .. أي بيت خالتك لا بيفوتو شمس ولا قمر ووسخ ومافيه لا كازوز ولا أكلات طيبة وهيك بيضيق عالنفس ..

_ لك هلأ جاوبني شو جابك لهون ؟

_ سرقت .. كم بسكوتة وكم أكلة طيبة من عند جارنا .. قام بعتتني معلمتي ” حكيمة ” لهون جزاتي , بتعرفني ما بحب اجي لعند بيت خالتي

_ وأخوك شو جابه لهون ؟

_ أخي قتل ابن الجيران ونزله الدم .. طيب أنت شو عامل ؟

_ أنا تحركشت بنت الجيران شوي .. كمان دغري بعتوني  وكان معي علبة بيرا كمان لقطوها ..

_ طيب شو بدي اسألك مين هداك يلي عند خالتنا وعم يتسمع ع حديثنا أول مرة بشوفو ؟

_ هاد اسمو ” كاتب ” بس ما بعرف شو قصتو تعال نسألو ..

_ شو قصتك شو عم تعمل عند خالتنا ؟

_ أنا كتبت موضوع تعبير لمعلمتي وما حبته وطلع بيمرض المشاعر قال وبيعمل تحسس

 _ عن شو كان الموضوع الانشائي ؟

_ كنت عم اشكيلها السراقين والمجرمين ويلي بيتحركشو البنات و بيعملوا شغلات مو منيحة !

Advertisements